Пирĕн шкул – интернатра чăваш чĕлхи эрни питĕ интереслĕ иртрĕ. Вĕренекенсем кашни кунах тĕрлĕ мероприятине хутшăнчĕç. Чи интересли вара чăваш писателĕсен калавĕсем тăрăх йĕркеленĕ инсценировкăсен конкурсĕ пулчĕ. Ку конкурса кашни класра вĕренекенех  тăрăшса хатĕрленнĕ.

     Конкурса пуçламăш класра вĕренекенсем пуçларĕç. Пĕрремĕшсем хальлĕхе тăван чĕлхене вĕренмеççĕ пулин те П.Эйзин çырнă «Ирхине» сăвва питĕ ăста выляса кăтартрĕç. Иккĕмĕшпе виççĕмĕш класра вĕренекенсем чăваш ачисен вăййисене выляма вĕрентрĕç. «Лашалла», «Саплăкла» вăйăсем чăнах та интереслĕ иккен, çакна куракансем алă хытă çупса хавхалантарнипе те çирĕплетме пулать. И.Яковлев çырнă «Лаша шырани» калава 4- мĕшсем ăста выляса савăнтарчĕç.

   Аслă классенче вĕренекенсем те конкурса тăрăшса хатĕрленнине палăртма кăмăллă. Уйрăмах куракансене «Çул çинче» (7б класс), «Тĕрлĕ мăнуксем» ( 8а класс), «Ăслă çĕвĕç» ( 8б класс), «Чаплă парне» ( 9а класс) сценкăсем килĕшрĕç. Кашни ачах хăйĕн сăнарне  тăрăшса вылярĕ.