Валентина Беловапа Наталия Яркеева йĕркеленипе Вăрнар районĕнчи Нурăсри хавшакрах сывлăхлă ачасене вĕрентсе пĕтĕмĕшле пĕлÿ паракан интернат-шкулĕн вĕрентекенĕсем çак кунсенче Чăваш ен наци радиовĕн эфирĕнче пулчĕç. Шкул утăмĕсем тата ÿсĕмĕсем çинчен, опытлă тата нумай çул хушши вăйне хурса тăрăшнă ĕçтешсем çинчен каласа пачĕç Г.Н. Захарова тата Л.И. Федорова педагогсем.

Çак шкула 1960-мĕш çулта уçнă. Малтанхи çулсенче те, хальхи тапхăрта та вĕрентекенсем пĕр тĕллевлĕ - ăс-тăн енĕпе йывăрлăхсем тÿсекен ачасене вĕренме, аталанма, пурнăç çулĕ çине тăма пулăшасси. Кăлтăксене палăртса тĕрĕс программăпа аталантарассине тĕпе хурса ĕçлеççĕ педагогсем. Ачасене вĕренме çăмăлтарах пултăр тесе ятарлă кĕнекесемпе, тĕрлĕ вăйă тата коррекци мелĕсемпе усă кураççĕ, ташă-юрă, спорт кружокĕсене явăçтараççĕ, çитĕнÿсемшĕн хавхалантараçcĕ. Вĕсем тăрăшнипе ачасем питĕ нумай ăмăртусене хутшăнаççĕ, дипломсемпе медальсем çĕнсе илеççĕ, туслăх тата пĕрлĕхлĕх хакне туйма вĕренеççĕ.

Передачăна эфира кăларнăшăн Галина Николаевнăпа Людмила Ивановна Валентина Беловăна тата Наталия Яркеевăна тав тăваççĕ.